Эътилофи зидди шиканҷа барои ҳимояи манфиатҳои Чоршанбиев адвокат пешниҳод кард

30-юми декабри соли 2021 Чоршанбиев Чоршанбе Авазхонович, варзишгар, блогер, зодаи шаҳри Хоруғи ВМКБ ҶТ ҳангоми вуруд аз шаҳри Маскави Федератсияи Русия дар Фурудгоҳи байналмилалии Душанбе боздошт шуд. Дар шабакаҳои иҷтимоӣ ва ВАО тарс аз шиканҷа ва муносибати бераҳмона нисбати ӯ инъикос гардид.

Рӯзи 31-уми декабри соли 2021 падари Чоршанбе Авазхон Паҳлавонов ба Эътилофи ҷомеаи шаҳрвандӣ зидди шиканҷа ва беҷазоӣ дар Тоҷикистон барои кумаки ҳуқуқӣ дар масъалаи боздошти писараш муроҷиат кард.

Вобаста ба муроҷиати Паҳлавонов А. Ч. Эътилоф барои ҳимояи ҳуқуқи Чоршанбиев Ч., ки 31-уми декабри соли 2021 ба парванда ворид гардида буд, се адвокатро ҷалб кард. 4-уми январи соли 2022 дар вохӯрии адвокатҳо бо Чоршанбиев Ч. ӯ истифодаи шиканҷа ва муносибати бераҳмонаро нисбаташ рад кард. Адвокатҳо таҳқиқи ин масъаларо идома медиҳанд.

Аз ҷониби Прокуратураи шаҳри Душанбе нисбати Чоршанбиев Ч. аз рӯйи моддаи 307, қ. 2, бандҳои «а» ва «г»-и КҶ ҶТ - «Даъвати оммавӣ барои бо роҳи зӯроварӣ тағйир додани сохти конститутсионии Ҷумҳурии Тоҷикистон», ки ҷазоро дар намуди маҳрум сохтан аз озодӣ ба муҳлати аз ҳашт то понздаҳ сол пешбинӣ намудааст, оғоз карда шуд.

5-уми январи соли 2022 адвокатҳо дар мавриди чораи пешгирӣ дар намуди ҳабс ба коллегияи судӣ оид ба парвандаҳои ҷиноятии Суди шаҳри Душанбе шикоят бурданд. Коллегияи судӣ шикояти кассатсионии адвокатҳоро беқаноат ва ҳалномаи Суди ноҳияи Шоҳмансури шаҳри Душанберо дар бораи интихоби чораи пешгирӣ дар намуди ҳабс аз 31-уми декабри соли 2021 бетағйир мононд.

То ба имрӯз А. Паҳлавонов - падари Чоршанбиев барои мулоқот бо писараш иҷоза нагирифтааст, вале вакилони мудофеъ дар ин самт кор мекунанд.

8-уми январи соли 2022 нисбати Чоршанбиев Ч. бо моддаи 307, қисми 2, бандҳои "а, г" айб эълон карданд. «Ман мақсади даъват барои бо роҳи зӯроварӣ забт кардани ҳокимияти давлатиро надоштам. Ман ин ҷиноятро содир накардаам ва намедонистам, ки муроҷиатам метавонад ҷиноят ҳисобида шавад. Ман бо дархости ба ҷавобгарии ҷиноятӣ кашидани гунаҳкорон муроҷиат кардам”,- мегӯяд Чоршанбе борҳо тариқи хаттиву шифоҳӣ.

Адвокатҳо қайд мекунанд, ки Чоршанбе барои тафтишот боз аст, дар нишондодҳои худ самимона аст ва ҳама чизро тавре мегӯяд, ки ҳаст. Сарфи назар аз айбномаи вазнин, ӯ некбин аст, ба саволҳои тафтишот бодиққат гӯш медиҳад, посух мегӯяд, шарҳ медиҳад. Ӯ мехоҳад фаҳмонад, ки зидди ҳукумат нест, марди варзиш аст, баъзан ба эҳсосот дода мешавад, вале дарҳол талош мекунад вазъиятро ислоҳ намояд. Ҳамеша дар маросими пирӯзияш бо парчами Тоҷикистон мебарояд. Чоршанбеи ҷавон, ки дар Русия дар варзиш комёбиҳо ба даст овардааст, барои варзишгарони ҷавони тоҷик намуна аст, ки бо талошҳои ҳаррӯзаи ҷисмонӣ на танҳо барои худ, балки барои кишвари худ низ комёбӣ меоранд.

Эътилоф даъват ба амал меорад, то аз паҳн кардани маълумоти тасдиқнашуда, ки метавонад ба Чоршанбиев Ч. зарар расонад, худдорӣ карда шавад.

NoTorture.Tj