Кумита барои тавсеаи уҳдадориҳои байналмилалӣ ва ба таври васеъ паҳн кардани мулоҳизаҳои ниҳоӣ тавсия дод

Кумитаи зидди шиканҷаи СММ мулоҳизаҳои ниҳоии худро пас аз баррасии гузориши даврии чоруми Ҷумҳурии Тоҷикистон оид ба иҷрои Конвенсияи зидди шиканҷа нашр намуд.

Гузориши Тоҷикистон дар ҷаласаҳои 2238 ва 2241-уми Кумита, ки рӯзҳои 14 ва 15-уми апрели соли 2026 баргузор гардиданд, баррасӣ шуд. Мулоҳизаҳои ниҳоӣ 27-уми апрели соли 2026 дар ҷаласаи 2256-уми Кумита қабул карда шуданд.

Масъалаҳои дигар

Кумита аз давлати иштирокчӣ даъват мекунад, то имкони қабули изҳоротро мутобиқи моддаҳои 21 ва 22-и Конвенсия, ки салоҳияти Кумитаро барои қабул ва баррасии муроҷиатҳои байнидавлатӣ, инчунин муроҷиатҳои инфиродии шахсони худро қурбонии нақзи Конвенсия медонистаро эътироф месозад, баррасӣ намояд.

Кумита ҳамчунин ба давлати иштирокчӣ пешниҳод мекунад, ки иҷрои уҳдадориҳои зимни муколама, инчунин дар доираи раванди шарҳи умумии даврӣ дар моҳи ноябри соли 2021 эълонгардидаро оид ба ҳамроҳшавӣ ба Конвенсия оид ба ҳуқуқҳои маъюбон идома диҳад.

Илова бар ин, ба давлати иштирокчӣ пешниҳод мешавад, ки гузориши пешниҳодгардида ва мулоҳизаҳои ниҳоии мазкурро тавассути сомонаҳои расмӣ, воситаҳои ахбори омма ва ташкилотҳои ғайриҳукуматӣ бо забонҳои дахлдор ба таври васеъ паҳн намояд ва Кумитаро дар бораи чораҳои андешидашуда ҷиҳати паҳн намудани онҳо огоҳ созад.

Кумита аз давлати иштирокчӣ хоҳиш мекунад, то гузориши навбатии даврии худро, ки панҷум хоҳад буд, то 1-уми майи соли 2030 пешниҳод намояд. Бо ин мақсад, ба давлати иштирокчӣ пешниҳод мешавад, ки то 1-уми майи соли 2027 ба тартиби содакардашудаи пешниҳоди ҳисобот розигӣ диҳад. Тибқи ин тартиб, Кумита пеш аз пешниҳоди гузориш рӯйхати саволҳоро ирсол мекунад ва ҷавобҳои давлати иштирокчӣ ба ин рӯйхат ҳамчун гузориши панҷуми даврии он мутобиқи моддаи 19-и Конвенсия баррасӣ хоҳанд шуд.

Матлаб дар доираи маъракаи иттилоотӣ бахшида ба 26-уми июн - Рӯзи байналмилалии дастгирии қурбониёни шиканҷа таҳия шудааст. Чорабинии мазкур ба боло бурдани сатҳи огоҳӣ дар бораи ҳуқуқҳои инсон, механизмҳои мавҷудаи ҳимоя аз шиканҷа ва имкониятҳои дастрас намудани ёрии ҳуқуқӣ барои ҷабрдидагон равона гардидааст.