Дар Душанбе ба муносибати Рӯзи байналмилалии ҳуқуқи инсон викторина баргузор гардид

3-юми декабри соли 2025 ташкилоти ҷамъиятии "Ҳуқуқи дастрас" (“Доступное право”), узви Эътилофи зидди шиканҷа ва беҷазоӣ дар Тоҷикистон викторинаеро бахшида ба Рӯзи байналмилалии ҳуқуқи инсон баргузор намуд. Тақрибан 20 нафар дар ин чорабинӣ иштирок карданд. Ҳадафи он баланд бардоштани саводнокии ҳуқуқӣ миёни ҷавонон, тақвияти фаҳмиши стандартҳои байналмилалии ҳуқуқи инсон ва ташвиқи иштироки онҳо дар ҳаёти ҷамъиятӣ буд.

Барнома аз панҷ сессияи мавзуӣ иборат буд. Дар сессияи аввал ба иштирокдорон шарҳи мухтасари Эъломияи умумии ҳуқуқи инсон, аз ҷумла ҳуқуқҳои асосӣ, принсипҳои баробарӣ ва бидуни табъиз, инчунин аҳамияти 10-уми декабр пешниҳод карда шуд. Сессияи дувум ба "Ҳуқуқи инсон ва тиҷорат" бахшида шуда, муаррифии Принсипҳои чаҳорчӯбаи СММ оид ба тиҷорат ва ҳуқуқи инсонро дар бар мегирифт.

Дар рафти сессияи савум ҳуқуқҳои манзилӣ ва ҳуқуқ ба сатҳи шоистаи зиндагӣ, аз ҷумла стандартҳои байналмилалии манзили муносиб ва ҳимоя аз кӯчонидан баррасӣ шуданд. Сессияи чорум ба ҳуқуқ ба озодӣ аз шиканҷа бахшида шуда, шарҳи Конвенсияи зидди шиканҷаи СММ ва қонунгузории миллиро дар бар гирифт. Сессияи панҷум ба механизмҳои ҳифзи ҳуқуқи инсон, аз ҷумла фаъолияти Ваколатдор, судҳо, ташкилотҳои ҷамъиятӣ ва расмиёти байналмилалӣ, аз қабили ШДУ ва КҲИ дахл дошт.

Ҳар як қисм бо викторина анҷом ёфт ва иштирокдорони фаъол туҳфаҳои хотиравӣ гирифтанд. Ташкилкунандагон тавсия доданд, ки дар оянда ҳолатҳои амалии бештар дохил, тренингҳо оид ба ҳуқуқи манзилӣ ва ҳимоя аз шиканҷа васеъ ва гурӯҳҳои ҷавонону муассисаҳои таълимии бештар ҷалб карда шаванд.

Ба иштирокдорон инчунин туҳфаҳои рамзӣ бо логотипи Эътилоф тақдим карда шуд.

Баргузории чорабинӣ бо дастгирии Фонди Зигрид Раузинг ва IPHR имконпазир гардид.